loader


Michel de Montaigne (1533-1592)

Type : personne

Identifiant BVH : bvhbibfr_00820

bvhbibfr_00820

Résultats

La Croix du Maine

1 notice principale (nom en vedette) [ réduire ]

noms de personnesbibliographietexte brut
originalrégularisé

[La Croix du Maine, page 328]
B. L. Messire MICHEL DE MONTAGNE, seigneur dudit lieu en Perigort,
Chevalier de l'ordre du Roy, & gentilhomme ordinaire de sa cham-
bre, Maire & gouverneur de Bordeaux &c.

Il nasquit en son Chasteau de Montagne l'an 1533. le dernier jour de
Febvrier.

Il fut premierement Conseiller du Roy audit Parlement de Bor-
deaux, mais apres la mort de son frere aisné il se deffist de cest estat,
pour suyvre les armes.

Il a espousé la fille de Messire Joseph de la Chassagne, l'un des
plus renommez Conseillers dudit Parlement, pere de Monsieur de
Pressac, Geufroy de la Chassagne, gentilhomme ordinaire de la
chambre du Roy (comme nous avons dit, parlant de luy cy devant en
son lieu.) Fault noter en passant, que au fueillet 124. il y a une faulte en
l'impression de ce livre, touchant le nom dudit Joseph: car l'imprimeur
a failly, ayant mis Isaac au lieu de Joseph: ce qui sera corrigé à la seconde
edition.

Pour revenir à parler de ce seigneur de Montagne, je diray librement
que les oeuvres qu'il a mises en lumiere, sont tellement suffisantes pour
tesmoigner de sa grande doctrine & jugement esmerveillable, & en-
cores de sa diverse leçon, ou varieté d'autheurs qu'il a leuz, qu'il n'est
besoing en cecy d'en parler plus avant, à l'endroit de ceux qui auront
consideré la structure de ce beau livre, qu'il a intitulé Essaiz: lequel a
esté imprimé à Bordeaux chez Symon de Millanges l'an 1580. en deux
volumes, & depuis encores l'an 1582. par luy-mesmes, & à Roüen aussi
& autres divers lieux, tant cest ouvrage a esté bien receu de tous hom-
mes de lettres. Et afin d'esclarcir le tiltre de ce livre, qu'il appelle Eßaiz,
& pour dire ce qu'il contient, & pour quelle raison il l'a ainsi intitulé,
j'en diray icy mon advis en passant.

En premier lieu ce tiltre ou inscription est for modeste, car si on veut
prendre ce mot d'Essaiz, pour coup d'Essay, ou apprentissage, celà est for
humble & rabaissé, & ne resent rien de superbe, ou arrogant: & si on le
prend pour Essaiz ou experiences, c'est à dire discours pour se façonner sur
autruy, il sera encores bien pris en cette façon: car ce livre ne contient autre
chose qu'une ample declaration de la vie dudit sieur de Montagne, & cha-
cun chapitre contient une partie d'icelle: en quoy me plaist for la response


[page 329]
que ledit sieur fist au Roy de France Henry 3. lors qu'il luy dist que
son livre luy plaisoit beaucoup. Sire (respondit l'autheur) il fault donq'
necessairement que je plaise à vostre Majesté, puisque mon livre luy
est aggreable, car il ne contient autre chose qu'un discours de ma vie,
& de mes actions.

J'ay entendu qu'il s'en trouve aucuns, lesquels ne loüent pas assez di-
gnement ce livre d'Essaiz, & n'en font pas autant de cas comme il le
merite: mais pour donner mon jugement en cecy, j'ose asseurer (sans
que je craigne que les hommes exempts de passion, ou affection par-
ticuliere, m'en puissent dementir) que ce livre est tres-recommanda-
ble, soit pour l'institution de toutes personnes, & pour autres choses
tres-remarquables qui sont comprises en iceluy. Et afin de dire en un
mot ce que j'en pense, je diray que si Plutarque est tant estimé pour ses
beaux oeuvres, que cetui-cy le doibt estre pour l'avoir imité de si pres,
principalement en ses opuscules: Et si Plutarque a esté estimé seul en-
tre les sçavants, duquel les oeuvres deussent demeurer (s'il arrivoit que
la perte se fist de tous les autres autheurs) je dy que celuy qui l'a suyvy
& imité de plus pres, doibt estre le plus recommandable apres luy, tout
de mesmes que celuy estoit estimé le plus excellent peintre qui pein-
doit le mieux apres Apelles. Mais c'est peult estre trop s'arrester sur un
article, il faut venir aux autres escrits dudit sieur de Montagne.

Il a traduit de Latin en François, les dialogues de la nature de l'hom-
me, escrits par Raymond Sebon ou Sebeïde, de nation Espagnole,
homme estimé le plus profond Theologien, & des plus grands Philo-
sophes de son temps, lequel florissoit à Tholose il y a deux cens ans
ou environ, & y exerçoit la medecine.

Ledit sieur de Montagne a traduit le livre susdit, par le commande-
ment de son pere, lequel le faisoit expressément, tant pour l'instruire
en la crainte de Dieu, que pour le façonner de plus en plus à apprendre
les bonnes lettres, & à s'exercer aux langues.

Ces dialogues ont esté imprimez à Paris chez Gabriel Buon l'an
1569. & chez Gilles Gourbin audit an.

Ce livre susdit s'intitule autrement, la Theologie naturelle de Ray-
mond Sebon
, docteur excellent entre les modernes.

Il a escrit un discours sur la mort d'Estienne de la Boëtie, Conseiller
du Roy à Bordeaux (son plus grand & plus fidel amy) &c. lequel livre
a esté imprimé à Paris par Federic Morel l'an 1572. avec la Mesnagerie
de Xenophon, & autres traductions faites par ledit de la Boëtie (com-
me nous avons ja recité cy devant parlant dudit autheur.

Il florist à Bordeaux cette annee 1584. âgé de cinquante ans, &
continue à profiter à la republique en toutes sortes & façons tres-
loüables.

[page 330]
Il y a un autre de ce nom de Montagne President à Montpellier, du-
quel nous ferons mention autre-part.

2 notices secondaires (nom cité) [ développer ]