loader


NICOLAS BERGERON

Type : notice

Source : La Croix du Maine

Identifiant BVH : lcdm-not_1541

lcdm-not_1541
noms de personnesbibliographietexte brut
originalrégularisé

[La Croix du Maine, page 336]
B. L. NICOLAS BERGERON, natif du Duché de Valois, Advocat au Par-
lement de Paris, homme tresdocte & bien versé en sa profession, sans
faire mention des langues Grecque & Latine, & autres sciences, qu'il a
aprises és plus celebres universitez de France (dont je ferois plus ample
recit, sinon que ceux qui sçavent que je luy suis intime & parfait
amy, penseroient qu'une trop grande amitié me le fist mettre par escrit
& non la verité de la chose, comme elle est.

Il a escrit & composé plusieurs divers traictez (desquels la plus gran-
de partie sont politiques, en faisant mention de la police & reglement
de Justice) &c. dont voicy le catalogue, suyvant le memoire qu'il en a
fait imprimer pour en faire part à ses amis, soit ou pour conferer d'iceux


[page 337]
ou pour recevoir memoires d'eux, afin de rendre les oeuvres susdits
plus accompliz & parfaits.

L'histoire Valesienne, touchant la louange & illustration, tant du
pays, que de la maison Royalle de Valois, de laquelle l'autheur a fait un
extrait qu'il a intitulé Le Valois Royal imprimé à Paris chez Gilles Beys
l'an 1583.

Table historialle, contenant un abregé de ce qui est advenu de plus
notable depuis le commencement du Monde, jusques à present, impri-
mee à Paris chez Jean le Clerc, Auuray & autres, l'an 1584. & à plusieurs
autres diverses annees: cette table avoit esté autrefois imprimee à Paris
chez Vascosan l'an 1562. tant en Latin qu'en François soubs ce nom de
Sommaire des Temps.

Description de l'estat, gouvernement & justice de France, suyvant
le dessein qu'il en a fait imprimer à Paris chez Jean Richier l'an 1574. re-
duit en table: ledit oeuvre entier n'est encores imprimé, mais seulement
la table du dessein & project d'iceluy.

Recueil de plusieurs Arrests notables, adjoustez à ceux qui avoient ja
esté recueillis par Jean Papon, imprimez à Paris chez Robert le Man-
gnier l'an 1584.

Il a reveu & recorrigé deux traictez de M. Claude d'Espense docteur
en Theologie, imprimez à Paris chez Guillaume Auuray l'an 1575.

Le procez verbal Latin & François, de l'execution testamentaire, de
feu Pierre de la Ramee dit Ramus, touchant la profession des Mathemati-
ques, instituee par luy, &c. imprimé à Paris chez Jean Richier l'an 1576.

Voyla ce qui se voit imprimé, touchant les oeuvres & compositions du-
dit sieur Nicolas Bergeron: s'en suit maintenant le catalogue de celles qu'il
a composees, lesquelles ne sont encores en lumiere, mais il espere de les fai-
re imprimer quand la commodité s'en presentera.

Enseignement pour tirer plaisir & profit de l'histoire.

L'Arbre universel de la suite & liaison de tous les arts & sciences.

L'histoire du droit des François.

La vraye methode pour bien escrire & discourir.

Extraict de quelques Edicts & Ordonnances non encores impri-
mees, lesquelles il a reduites suyvant les regnes des Roys de France, qui
les ont faites.

Instruction à la lecture des Coustumes de France, avec les expositions
des termes & façons de parler les plus obscures.

Project pour bien dresser une generale reformation, tant de la Justi-
ce que du Domaine.

Advis du vray & naturel langage François, traictant de son origne,
accroissement & perfection.

Advertissement pour bien traicter les arts & sciences, en langue vul-
gaire, & singulierement en François.

[page 338]
Le Palais Royal de Paris, comprenant la recherche memorable, de
l'antiquité tant des bastimens, que des jurisdictions & ressors d'iceluy.

Le Calendier de la Cour de Parlement, touchant l'observation des
temps, jours & heures des plaidoiries, & autres solennitez & ceremonies.

Somme Theologique en façon de Catechisme artificiel & Catho-
lique, tant en Latin qu'en François.

Devis Methodique dé la vraye Rhetorique, & Dialectique Françoise.

Amas ou recueil, des reglemens des Juges, & officiers de Justice.

Memoire Geographique, des quatre parties de l'Univers.

Denombrement des plus illustres maisons, & familles du Monde,

avec un discours de l'invention & usage des Armoiries.

Traicté de la Gaule-France, demonstrant la vraye source, commen-
cement, succez, & advancement des François.

Paradoxes, ou singulieres propositions politiques, avec plusieurs gra-
ves questions.

Promptuaire de la langue Françoise, par une Nomenclature methodique,

Brefve disposition & interpretation des ordonnances des eaux & forests.

Annotations sommaires, sur la coustume de Valois.

Formulaire de pratique pour les Advocats & Procureurs, accom-
modee à nostre temps.

Paraphrase sur les institutes & regles de droict.

Instruction & table analitique de l'Admirauté & Marine, avec le re-
cueil des Edicts & ordonnances de mesme argument.

Je ne fay point icy mention de plusieurs autres opuscules & tradu-
ctions, ensemble de beaucoup d'Epitaphes, Epigrammes Grecs, Latins
& François composez par ledit sieur Bergeron.

Il florist à Paris cette annee 1584. non sans prendre peine de profiter au
public en toutes façons, dignes d'un homme vertueux. Quant à ses oeuvres
en Latin & principalement sur le droit, j'en feray mention autre-part.