JEAN DE NOSTRE-DAME

Fiche personne

[La Croix du Maine, page 253]
JEAN DE NOSTRE-DAME, DIT NOSTADAMVS, procureur en
la Cour du Parlement de Provence , frere de Michel Nostradamus
Astrologue & Mathematicien, tant renommé.

Cetui cy Jean de Nostre-dame a recueilly de divers autheurs les vies
des plus celebres & anciens Poëtes Provençaux , qui ont flory du temps des
Contes de Provence , escrites premierement en langue Provençale ,
& depuis traduites par luy en nostre langue Françoise, imprimees l'an
1575. à Lyon par Basile Bouquet, pour Alexandre Marsilij. Nous avons
employé en cet oeuvre les noms desdits Poëtes, alleguez par le susdit
de Nostre-dame, mais il faut penser que nous avons aussi recueilly ce
catalogue, de ceux qui ont escrit de ce subject avant luy, comme de ces
trois excellents Florentins, Dante, Petrarque, & Bocace, & encores des
oeuvres du Cardinal Bembo, lesquels en ont fait mention en leurs oeu-
ures: & autres aussi qui sont modernes, sçavoir est du livre Italien, inti-
tulé J Marmi del Doni, auquel livre il fait tres-ample mention d'Arnault
Daniel, Poëte Provençal , & racompte sa vie & ses compositions escri-
tes en langage usité pour lors en Provence , & confesse l' avoir prise du
livre contenant les vies des anciens Poëtes Provençaux , lequel fut don -
né à Monsieur le Legat du Pape à Venise Messire Loys Beccatel, qui
avoit esté pris de la Bibliotheque dudit R. Cardinal Bembo. Ledit Jean
de Nostre-dame a encores escrit les livres qui s' ensuyvent . L'histoire
de Provence , imprimee à Lyon ou autre-part.

Il florissoit en la ville d'Aix en Provence l'an 1575. Je ne sçay s'il est
encores vivant . Je prie Dieu de luy donner longue & heureuse vie, &
luy faire cette grace que de poursuyvre sa recherche tant louable & cu-
rieuse des anciens personnages illustres pour les lettres, lesquels ont
flory en son pays & autres lieux de France.