loader


HENRY DE VALOIS, III. du nom

Type : notice

Source : La Croix du Maine

Identifiant BVH : lcdm-not_0851

lcdm-not_0851
noms de personnesbibliographietexte brut
originalrégularisé

[La Croix du Maine, page 167]
HENRY DE VALOIS, III. du nom, tres-Chrestien Roy de France & de
Pologne, fils de Henry II. du nom, & frere de Charles 9. (duquel nous
avons fait mention cy devant,) comme aussi nous avons parlé de son
pere grand le Roy François 1. (ce que je repete pour monstrer que les
Roys de France ont aymé les lettres & qu'ils en ont rendu tesmoigna-
ge par leurs escrits.)

J'ay peur que voulant dire selon la verité, les loüanges qui sont en ce
Prince, l'on n'aye opinion de moy, que je le face plustost par flaterie
qu'autrement: d'autant que je me suis proposé de consacrer à sa majesté,
ce mien oeuvre des Escrivains François: mais ceux qui auront bien co-
gneu, combien il est eloquent, voire des plus de son siecle, on jugera
que je ne fay que le devoir d'un historien veritable, d'asseurer que sa
Majesté à cet heur là, donné de Dieu, qu'aucun ne se peut vanter de dis-
courir & poursuyvre plus elegamment un subject proposé, qu'elle fera
si elle employe les forces de son divin esprit, & use des dons, que la na-
ture luy a prodiguement departis, non en ce cas seulement, mais en
plusieurs autres desquels j'en remets le jugement à la posterité, exem-
pte de toute passion, affection, ou jalousie: & pour tesmoing de cecy,
j'allegueray la harangue, qu'il prononça en la presence des estats de son
Royaume, assemblez en sa ville de Blois, l'an 1576. le 6. de Decembre, la-
quelle se voit imprimee à Paris, & en autres divers lieux de son Royau-
me. Sa majesté en a prononcé plusieurs autres, tant en son Parlement de
Paris, qu'en d'autres endroits, non encores imprimees. Les doctes hom-
mes qu'il a d'ordinaire au service de sa Majesté, tesmoignent assez l'affe-
ction qu'il porte aux lettres, sans que j'en parle icy plus amplement.

Il florist cette annee 1584. & je prie Dieu vouloir augmenter son regne
en toutes sortes de felicitez, & luy donner l'accomplissement de ses
desirs.